Nakuhaan sang video ang pagbaslanay sang palupok sang mga kabataan sa Esplanade nga natung-an sang Desamparados, Jaro kag Bakhaw, Mandurriao sang December 26 sang hapon.
Suno kay Police Captain Val Cambel, hepe sang Mandurriao Police Station 10, December 27 sang may na-respondehan sila nga grupo sang mga kabataan nga nagatiniruhay gamit ang mga palupok sa nasambit nga lugar.
Base sa initial nga impormasyon mga menor-de-edad ang involved sa pagbasalanay sang palupok.
Apang wala sang may na-rescue tungod nga nagdinalagan sang makita ang mga pulis.
Suno sa imbestigasyon sang pulis mga taga- Calubihan, San Vicente, Desamparados, Jaro kag Taft North, Mandurriao ang mga posible involved nga kabataan.
Sa subong, gina-validate pa ni Cambel kon ang video nga na-post sa social media amo man ang adlaw nga ila na-respondehan, tungod suno sa iya may iban pa nga adlaw nga naghinabuyanay sang palupok ang mga kabataan sa lugar.
Naga-coordinate na sa Police Station 10 ang Police Station 9 agud magbuligay para makilala ang mga menor-de-edad.
Ginathag man niya nga wala nalakip sa designated firecrackers zone ang amo nga lugar. — Aksyon Angel Mae Ciudad
