Nagapati ang Department of Social Welfare and Development nga indi lang isolated incident ang kontrobersiya nga naga-involve sa Assistance to Individuals in Crisis Situation (AICS) program kundi kabahin sang pre-planned, systematic, kag orchestrated nga practice.
Ini ang ginpabutyag ni DSWD Assistant Secretary Paul Ledesma makaligad nag-deploy sa labing una nga tion sang fact-finding team ang DSWD central office agud imbestigaran ang reklamo sang mga AICS beneficiaries nga ginabuhinan sang mga barangay officials ang ila ayuda.
Ginpahayag ni Ledesma nga nakabaton siya sang mga mensahe nga nagapahibalo nga madugay na nagakatabo ang ginareklamo nga sistema.
Sa pagkamatuod suno sa iya, may nagahambal nga naandan na ini sa kada payout sa barangay level.
Ginapanan-aw niya nga kon pre-planned, systematic, kag orchestrated ang amo nga sistema, may nagakontrol diri nga grupo kag kon basehan suno sa iya ang natipon nila nga statements, ginatudlo ang mga barangay officials.
Base sa claim sang mga tagreklamo, ginarason sang mga barangay officials nga kinahanglan buhinan ang ayuda agud ihatag sa mga wala nadala sa listahan sang beneficiaries.
Makabig ini nga illegal suno kay Ledesma tungod ang ayuda ang para lang gid sa individual in crisis situation.
Ginhatagan sang isa ka bulan ang fact-finding team nga tapuson ang imbestigasyon kag makapaguwa sang rekomendasyon.
Magluwas kay Ledesma, lakip man sa team ang anay imbestigador sang Office of the Ombudsman kag anay prosecutor sang Department of Justice.
