ILOILO CITY — Nakuhaan sang video ang paglagsanay kag pagpungkuyanay sang bato kag botelya sang mga pamatan-on sa Zone 10, Barangay Calaparan, Arevalo mga las-kuwatro kahapon sang kaagahon, Enero 9.
Suno sa netizen nga nag-post nga si Pearl Joy Belarmino Anacan, antes ang paglagsanay sang mga pamatan-on, may duha na ka grupo nga nagatipun-tipon: isa sa Zone 11 kag isa sa Zone 10 sa direksyon padulong sa Calumpang.
Ginsaway pa sang mga tawo sa lugar ang mga pamatan-on apang wala sila nagpati. Ginpahalin lang nila ang mga tanod nga naga-standby sa Barangay Peacekeeping Action Team (BPAT) center antes maglagsanay.
Una nga nanglagas ang mga yara sa side sang Calaparan kag nagbalos naman ang mga yara sa Calumpang nga side.
Sa una nga parte sang video, makita ang lalaki nga ginalagas ang pila ka pamatan-on samtang nagapalupok sang airsoft gun kag may nagasunod sa iya grupo man sang mga lalaki nga may barakol nga dala.
Pero pila ka segundos, nag-atras man sila bangud ginlagas sang pihak nga grupo nga may dala man nga barakol.
Kasunod sini, makita na ang pagpungkuyanay sang bato kag botelya sang magtimbang nga grupo. Naglawig ini sang kapin sa 30 minutos, dugang ni Anacan.
Suno kay Anacan, may mga pumuluyo man nga nag-report sa police parte sa natabo apang wala sang may nagresponde.
Nauntat lang ang paghabuyanay sang nagpalagyo sa nagkalain-lain nga direksyon ang mga pamatan-on.
Pangayaw suno kay Pearl ang mga involved kag indi pamilyar sa ila. Ini na ang ika-tatlo nga beses nga may naglasanay nga mga pamatan-on sa ila lugar.
May nag-abot man nga tanod sa area suno kay Pearl, apang wala niya na maabtan ang ginamo.
Ipausisa sang barangay officials ang paglagsanay kag paghabuyanay sang botelya sang mga pamatan-on.
Suno kay Kagawad Rodrigo Montaño, wala naga-untat ang mga barangay officials sa paghimo sang mga paagi agud mag-untat ang kasubong nga mga insidente.
Indi malikawan suno sa iya nga may nagakatabo nga ginamo sang pila ka mga pamatan-on sa ila lugar bangud may mga pangayaw nga nagalagaw kag naga-grupo grupo sa mga pamatan-on sa ila barangay.
Nagapanawagan siya sa mga ginikanan nga disiplinahon gid ang ila kabataan bangud ginahimo man sang nga barangay officials ang ila obligasyon.
Gin-ako ni Montaño nga may mga nagluntad nga ginamo sa ila barangay nga ginkaulamiran sang mga pamatan-on apang indi pa makumpirmar kun pareho gihapon ang mga involved.
