ILOILO — Estable na ang pahinante nga napilasan sang nahulog ang ginasakyan nga pribado nga jeep sa Brgy. San Jose, Tubungan, kahapon, Nobyembre 22.
Suno kay Police Corporal Mark Anthony Tanallon, imbestigador sang Tubungan Municipal Police Station, naglamsot ang preno sang jeep pag-abot sa dulhugon nga porsyon sang dalan, rason nga nadulaan sang kontrol sa manibela ang driver.
Ginbunggo sang driver sa streetlight ang jeep nga nahulog sa banglid.
Halin sa Brgy. Jona padulong sa syudad sang Iloilo ang jeep.
Naga-install sang stainless glass ang pito ka sakay sang jeep, suno sa pulis.
Sa pagpaathag sang driver sa pulis, ginsiguro niya nga naka-condition ang jeep antes ginmaneho. — ARI trainee Robert Nietes
