Pamilya sang dalaga nga ginpatay sa Tubungan, nagpanawagan sa mga vloggers, content creators nga indi na paghimuon nga content ang kaso ni alyas Kendi

ILOILO CITY — Nagpangabay sa mga vloggers kag content creators ang pamilya ni Alyas Kendi, ang dalaga nga ginpatay kag gin-rape sa Brgy. Ingay, Tubungan, nga untatan na ang paghimo nga content sa natabo sa dalaga.

Ginhimo ni Rene, amay ni Kendi, ang panawagan sang nakita sa social media nga ginahimo nga “memes” ukon kaladlawan ang kaso sang dalaga.

May mga vloggers kag content creators man suno sa iya, nga gina-content ang litrato sang iya bata agud makakuha sang madamo nga views.

“Nagapangabay lang ko sa mga vloggers, content creators nga kuntani indi nila paggamiton ang picture sang bata ko nga himuon nila nga memes, ginagamit nila nga content sa TikTok kag ginahimo nga kaladlawan,” suno kay Rene sa interview sang Aksyon Radyo Iloilo.

“Sakit nga daan ang iya naabtan, tapos wala pa nila ginarespeto,” dugang pa ni Rene.

Hunyo 17 sang hapon, nasapwan nga patay si Alyas Kendi sa sulod sang iya kuwarto. Base sa autopsy result, multiple traumatic injuries sa ulo ang ginkamatay sang dalaga kag kumpirmado nga gin-abusuhan sexual ang dalaga.