ILOILO — Napatay samtang ginabulong sa ospital ang 41-anyos nga panday sang gintiro sang riding-in-tandem sa Poblacion Ilawod, Lambunao.
Na-igo sa tuo nga abaga si alyas Rod, residente sang Barangay Jayubo, Lambunao.
Suno Kay Police Captain Jose Winston Biadog, hepe sang Lambunao Municipal Police Station, nagapanaug sa motorsiklo nga iya ginsakyan ang biktima sang gintiro.
Pakadto sa iya gina-obrahan ang biktima sang natabo ang insidente.
Dugang pa ni Biadog, posible nga ginsundan sang mga suspek si Rod.
Sa subong, indi pa gid matumod sang mga pulis kon ano ang motibo tungod suno sa pamilya wala sila sang may nahibaluan nga kontra ang napatay.
Nagpalagyo pakadto sa direksyon sang Calinog ang mga suspek nga wala pa nakilala. — Aksyon Angel Mae Ciudad
