Pangayaw dakup sa drug buy bust operation sa San Miguel, Iloilo

ILOILO — Arestado si Peter Paul Ballarta, 29-anyos sa gin-conduct nga drug buy bust operation sa Barangay San Jose, San Miguel las-8:45 kagab-i.

Residente sang Sto. Nino Norte, Arevalo ang suspek apang temporaryo nga naga-istar sa Barangay Bakhaw, Mandurriao.

Na-recover kay Ballarta ang buy bust item nga isa ka sachet sang suspected shabu nga nagabug-at sang isa ka gramo, buy bust money nga P500 kag duha ka elongated sachets sang suspected shabu.

Suno kay Police Major Richard Lao, hepe sang San Miguel Municipal Police Station, gina-contact lang sang mga nagabakal si Ballarta kag iya gina-deliver ang item.

Lakip sa non-drug items nga nakuha amo ang cellphone, wallet, motorsiklo, mga IDs, kag isa ka roll sang aluminum foil.

Isa ka semana nga gin-monitor sang San Miguel Police ang subject nga ginapatihan may ara sang mas daku nga ginakuhaan sang illegal drugs.

Sakop sa area of operation sang subject ang San Miguel, Sta. Barbara, Pavia, Oton kag Alimodian.

Naka-detain sa San Miguel Municipal Police Station si Ballarta.