ILOILO CITY — Balik presuhan ang 50-anyos nga subject sang nadakpan sa drug bust operation sa Brgy. San Antonio, Molo kaina sang aga.
Suno kay Police Major Marvin Villanueva, deputy chief sang Regional Police Drug Enforcement Unit, taga-Alimodian ang subject pero temporaryo nagatiner sa San Antonio. Nagabug-at sang 375 grams ang suspected shabu nga na-recover kag nagabalor sang P2,550,000.
Septiyembre 2013 sang una nga na preso si alyas Ling may kaangtanan sa illegal drugs kag Agosto 2021 nakaguwa.
Nagdugay sang pito ka bulan ang monitoring sang mga pulis sa subject kag makapila na ka beses gintinguhaan nga ma-operate pero nagasaylo-saylo sang ginatiniran.
Magluwas sa illegal drugs, na-recover man sang mga pulis ang calibre .45 nga pistol sa subject. — Aksyon Maria Kayla Tingzon
