ILOILO CITY — Nadakpan sang guwardiya sang St. Clement’s Church sa La Paz ang pangayaw nga nagkawat sang P500 nga coins halin sa donation box sang nagbalik mga las-2 kaina sang kaagahon, Domingo sang Pagkabanhaw.
Suno kay Police Captain Gimel Acuesta, officer-in-charge sang Iloilo City Police Station 2 sa La Paz, kahapon sang aga, Sabado de Gloria, nanotisyaran sang mga personnel sang simbahan nga nadula ang koleksyon sa donation box.
Sang gin-review ang CCTV camera nakita nga may lalaki nga nabilin sa sulod sang simbahan sang nasiraduhan na pagkatapos sang “Duaw” sang Biyernes Santo.
Sa paglantaw nga mabalik pa ang lalaki, ginbantayan siya sang guwardiya tubtob nga kaina sang kaagahon nadakpan antes pa makasulod sa simbahan.
Sang gin-usisa ang lalaki nga si alyas Andoy, nahibaluan nga 25-anyos siya kag residente sang Barangay Walang, Lambunao.
Ginpabutyag man sang guwardiya nga sang nagligad nga mga inadlaw nagabalik-balik si Andoy sa simbahan.
Nagpamalibad naman si Andoy sa paghatag samg dugang nga detalye sa rason nga nakalab-ot siya sa siyudad kag kon diin na ang kwarta nga iya nakuha.
Detained si Andoy sa La Paz police station. — Aksyon Maria Kayla Tingzon
