ILOILO — Na-rescue sang mga residente sa Brgy. Trapiche, Oton ang pawikan nga gin-anod sa higad sang baybay.
Suno kay Mr. Edwin Erecre, Wildlife Enforcement Officer sang Municipal Environment and Natural Resources Office (MENRO) Oton, adult green sea turtle ini nga may kalabaon nga 39 centimeters, kalaparon nga 37 centimeters kag nagabug-at sang 5.5 kilo.
Ginpahayag ni Erecre nga maluya na ang pawikan sang ginkadtuan kag gin-evaluate gani gindesisyunan nga indi anay pagbuy-an kag i-turnover sa Southeast Asian Fisheries Development Center (SEAFDEC) sa Tigbauan.
Wala man sang may nakita nga pilas sa lawas sang pawikan suno kay Erecre kag ginapatihan nga gin-igo ini sang dalagku nga balod tungod sang malain nga panahon kag gin-anod sa higad sang baybay.
Sa subong, naga-improve na ang kondisyon sang pawikan sa SEAFDEC kag padayon nga gina-obserbaran. Kon lubos na ini nga mag-ayo, buy-an ini sa dagat suno pa kay Erecre.
