ILOILO — Temporaryo nga wala naka-operate ang GT Town Center sa Ungka, Pavia sang natukiban nga ginsulod sang kawatan ang pawnshop and jewelry store kag money changer nga yara sa mall kaina sang aga.
Suno kay Iloilo Police Provincial Office director, Colonel Bayani Razalan, sa tamburong nag-agi ang mga suspek tubtob nga nakalab-ot sa idalum Nuat Thai Foot and Massage.
Gin-jack sang mga suspek ang tiles sang Nuat Thai Foot and Massage, nagsaka sa kisame kag naglusot pakadto sa jewelry store kag money changer.
Una nga nakita sang nag-duty nga security guard ang guba sang kisame.
Wala sang may nadula sa Nuat Thai, samtang ginabanta sa P500,000 ang nadula sa money changer suno kay Razalan.
Wala pa mahibaluan kon pila ang nadula sa pawnshop and jewelry store tungod nagapdayon pa ang inventory.
Na-recover sa lugar ang jack kag mga kahoy nga ginapatihan gingamit sang mga kawatan sa pagbuho sa tiles sang mall.
TERMITE GANG
Ginapatihan ni IPPO Director Razalan nga mga miyembro sang Termite Gang ang nagsulod sa GT Town Center kag nagpangawat sa pawnshop and jewelry store kag money changer.
Indi magnubo sa tatlo ang suspek sa pagpangawat suno kay Razalan.
Ginpahayag niya nga mapa-anggid sa Termite Gang ang ginhimo sang mga suspek nga naga-agi sa drainage agud makalusot sa establisyemento nga luyag nila kawatan.
May nakuha na nga CCTV footage ang kapulisan kag ipa-enhance ini agud ma-identify ang mga suspek.
Natumod na sang IPPO ang posible gin-agyan sang mga suspek pasulod sa mall kag kon diin sila nagguwa suno pa kay Colonel Razalan. — Aksyon Angel Mae Ciudad
