ILOILO — May porsyon sang Ungka flyover nga bakbakon suno kay Department of Public Works and Highways (DPWH) 6 Asst. Regional Director Jose Al Fruto.
Ginhimo ni Engr. Fruto ang pahayag sa regular session sang Sangguniang Bayan sang Pavia sang Abril 24 nga iya gintambungan.
Suno kay SB Member Pyt Trimañez, gin-usisa si Fruto parte sa update sa imbestigasyon sang third party consultant sa Ungka flyover kag nagsabat siya nga “I’m confident nga indi man bilog nga flyover ang gub-on.”
Sunod siya nga ginpamangkut kun may gub-on gid man nga porsyon sang flyover pero nagsabat si Fruto nga hulaton na lang si DPWH Sec. Manuel Bonoan nga magpaguwa sang opisyal nga update.
Ginkakibot suno kay Trimañez sang mga miembro sang Sangguniang Bayan ang sabat ni Fruto.
Ginpaathag ni Trimañez nga nagahulat sila sang update sa imbestigasyon sa Ungka flyover para makapreparar man sila ilabi na sa traffic scheme kag sa safety sang mga tawo nga nagalabay kag naga-estar sa palibot.
Nagpanawagan si Trimañez sa natungdan nga ahensiya sang gobyerno nga tutukan ang flyover tungod isa ang mga taga-Pavia sa mga apektado sa problema sa Ungka flyover.
