ILOILO CITY—Wala na sang limitasyon sa “configuration” ukon ang arrangement sa pangkabilugan nga istuktura sang props sa mga mapasakop sa Dinagyang Tribes competition subong nga tuig.
Ini ang ginpaathag ni Prof. Eric Divinagracia, Festival Director sang Dinagyang Festival 2026, angut sa una na ginpabutyag ni Mayor Raisa Treñas nga wala sang limitasyon ang kadakuon sang gamiton nga props.
Ang configuration nga ginatumod ni Divinagracia amo ang pagtakod ukon pagsugpon sang isa ka parte sang props sa isa pa ka parte agud mahimo nga isa ka bilog nga prop.
Halimbawa, para sa props nga pispis, dapat ang kada parte sini indi maglapaw sa 10 ka tapak ang kalaparon, kag 12 ka tapak ang kataason.
Ini ang gintakos sa standard nga kalaparon sang dalan kag kataason sang mga wirings sa poste nga maka-igo ang paglabay sang props.
Pero wala sang limitasyon sa pangkabilugan sini nga kataason kag kalaparon kon ma-configurate na, dugang pa ni Divinagracia.
Dugang pa ni Divinagracia, “bahala na sila (mga tribu nga mapasakop) so as long as maka-igo lang sa stage (ang props).” — Aksyon Marvin Malificiar
