ILOILO CITY — Wala sang may ginduhol nga kwarta ang driver sang salakyan sa traffic enforcer nga nag-apprehend sa iya sa Taft North, Mandurriao.
Ini ang gin-athag sang Public Safety and Transportation Management Office (PSTMO) sa nagalapta subong sa social media nga video sang traffic enforcer kag gin-apprehend nga driver nga nakuhaan nga may ginduhol.
Ginpabutyag sang netizen nga nakakuha sang video, natabo ang insidente pasado las-5 kahapon sang hapon, Agosto 11. Nautod suno sa iya ang video tungod nag-green na ang traffic light.
Sang nakalab-ut kay Mayor Jerry Treñas ang nasambit nga video, gilayon niya ini nga ginpa-imbestigaran sa PSTMO.
Naguwa sa imbestigasyon suno kay Treñas nga naga-obstruct ang driver sa pedestrian lane tungod na-abutan siya sang red light gani gin-flagdown siya sang traffic enforcer kag gin-eksplekar ang violation sa driver.
Sang nagpalapit ang traffic enforcer, nagpangayo sang pasaylo ang driver, suno sa PSTMO. Gin-insist sang traffic enforcer ang driver nga makita ang iya driver’s license agud ma-verify kun valid license holder siya.
Driver’s license ang gindaho sang driver sa traffic enforcer kag indi kwarta, suno kay Treñas base sa imbestigasyon sang PSTMO.
Gilayon naman nga ginbalik sang traffic enforcer ang driver’s license sang driver kag ginpasensyahan na lang sang enforcer ang driver.
