ILOILO — Patay ang pulis nga nagarangko sang corporal sang natiruhan sa Brgy. Polot-an, Pototan pasado las 12 subong nga hapon.
Sa initial nga impormasyon sang Aksyon Radyo Iloilo news team, naga-surveillance ang pulis sa subject nga si Michael Solis, 41-anyos sang amo man nga barangay.
Base sa source sang Aksyon Radyo Iloilo, bag-o lang na-assign sa Pototan Police Station si Police Corporal Reo Manero kag naka-agi man assigned sa Provincial Drug Enforcement Unit sang Iloilo Police Provincial Office (IPPO).
Kabahin sang intel operatives sang Drug Enforcement Unit sang Pototan Police Station si Manero.
Suno sa tiya ni Solis, nakabati siya sang tatlo ka mga lupok.
Nakita man niya ang pagguwa ni Solis sa ila balay, nagsakay sa motorsiklo kag nagpalagyo.
Nakaagum sang apat ka pilas sang pagkatiro si Manero. — via Aksyon Angel Mae Ciudad/Marvin Malificiar
