Nakuhaan sang video ang rambol sang duha ka grupo sang kalalakihan sa atubang sang aksyon radyo Iloilo kahapon sang kaagahon, Enero 15.
Base sa kuha sang CCTV camera sang estasyon, las 4 sang kaagahon sang nakita nga may nagatipon nga mga lalaki sa nagapondo nga taxi sa kilid sang estasyon.
Pila ka minutos ang nakaligad, may nagdulog nga pick-up kag nagpalapit sa grupo ang mga sakay.
Makita pa nga naga-istoryahanay ang duha ka grupo sang gulpi nga nagsumbaganay, naghabuyanay kag naglinagsanay.
Nag-abot sa lugar ang mga pulis apang wala na nila naabtan ang iban nga involved sa kinagamo.
Suno kay Police Lieutenant Benjie Dicen, Deputy Station Commander sang Mandurriao Police Station, masobra 10 ka mga indibidwal ang involved sa insidente.
Nagapadayon ang imbestigasyon kag validation sang Mandurriao police sa identity sang mga may kahilabtanan sa kinagamo.
Ginmanduan ni Iloilo City Mayor Jerry Treñas ang kapulisan paagi kay Iloilo City Police Office ukon ICPO Director PCOL Leo Batiles nga siguraduhon ang presensya sang mga pulis sa tanan nga lugar ilabe na sa mga lugar nga masami ginakadtuan sang madamo nga tawo.
Ini agud malikawan ang pagluntad sang ginatawag sang alkalde nga “free for all rambol” pareho sang natabo sa atubang sang estasyunan sang Aksyon Radyo Iloilo kahapon sang kaagahon.
Ginmanduan man niya ang mga pulis nga imbestigaran ang insidente kag pasakaan sang kaso ang mga involved sa kinagamo.
