ILOILO CITY — Nagpangayo sang pasensya si former Mayor Jed Patrick Mabilog sa Aksyon Radyo sa mga natabo sang siya pa ang alkalde sang siyudad.
Sa iya nga press conference sang Setyembre 20 sa iya pagpauli sa siyudad, ginpabutyag sang anay alkalde nga may indi pag-intiendihanay nga natabo sa kampanya sang siyudad kontra illegal nga druga.
Madumduman nga sang gindala sang Aksyon Radyo Iloilo ang kawsa kontra sa illegal nga druga, nangin mahipos ang anay alkalde.
Ginpabutyag pa sadtu ni Mabilog nga indi maka-alarma ang illegal drugs sa siyudad.
Nagdepensa si Mabilog sa akusasyon nga wala siya sang may ginhimo sa kampanya kontra illegal nga druga sang siya pa ang alkalde sang siyudad.
Ginpaathag sang anay alkalde nga sang nagpadalagan siya kag nagdaug, wala siya nakaagi training ukon seminar sa Department of the Interior and Local Government (DILG) may kaangtanan sa enforcement sang kapulisan kag sa kampanya kontra illegal nga druga.
Suno sa iya, ang naagyan niya nga training sa DILG amo ang parte sa good governance, panghimanwa, disaster resilience, kag fiscal management.
Kun basehan ang local government code, pagdihon sang polisa ang function sang mga local chief executives sa kampanya kontra illegal nga druga bisan pa may administrative power ang mga alkalde sa kapulisan.
Ginpabutyag ni Mabilog nga ang Philippine National Police (PNP) kag Philippine Drug Enforcement Agency (PDEA) ang mga primary agencies nga in-charge sa enforcement kag ang mayor ang masalig sa PNP kag PDEA sa enforcement sang laye sa kampanya kontra illegal nga druga base sa local government code.
