ILOILO — Napatay samtang ginabulong sa ospital ang seaman nga nagtupa ang ulo sa semento sang nahulog sa jeep sa Barangay Jibao-an, Pavia las-9:45 kagab-i.
Suno kay Police Staff Sergeant Crisande Maquiling, imbestigador sang Pavia Municipal Police Station, nagadalagan ang jeep nga Leon sang nahulog ang pasahero nga seaman.
Sa pagpangusisa sang police sa iban pa nga mga pasahero, may pasahero nga nakakita sa seaman nga may ginkuot sa iya bulsa. Tungod sini nadulaan siya sang balanse kag nahulog.
Yara na sa Jibao-an ang jeep sang nagkabit ang seaman pero wala matalupangdan sang driver tungod naga-ulan.
Antes sini ginhambalan pa sang mga pasahero ang seaman nga magsulod tungod ligwa man pero wala siya nagpati.
Madasig ang pagpadalagan sang driver sang jeep tungod matawhay ang dalan.
Ginalantaw nga naka-inum ang seaman tungod nakasugid ang iya asawa nga halin siya sa ila reunion sa Leganes.
Gin-custody sang Pavia police ang driver sang jeep. — Aksyon Maria Kayla Tingzon
