ILOILO CITY— Wasak ang ulo sang senior citizen nga babaye sang nalasakan sang truck sa Brgy. Baldoza, La Paz subong nga aga.
Halin sa Ticud, La Paz ang truck kag pakadto sa Loboc, Lapuz ang direksyon.
Suno sa nakakita, nagatabok si Editha Lacorte Caboberde, 72-anyos, residente sang Zone 1 Brgy. Ticud, La Paz kag nakabaston. Nag-uyat siya sa unahan sang truck nga nagpondo.
Nakita sang mga residente nga gulpi lang naglakat ang truck kag nagsuhot ang senior citizen. Nagtinguha pa nga magkamang pero nalasakan sang pang-ulihi nga ruweda ang babaye.
Ginpahayag ni traffic investigator Police Executive Master Sergeant Julius Uy nga nagpabutyag ang driver sang truck nag wala niya makita ang senior citizen tungod sa kilid sya nag-agi.
Gin-detain ang driver sang truck sa Police Station 2. — Aksyon Farrah Mae Morano
