ILOILO — Magapangatubang sa kaso nga murder with the use of an unlicensed firearm ang senior citizen nga suspek sa pagtiro sa iya utod sa Brgy. Talongonan, Passi City kagab-i.
Dead-on arrival sa ospital si alyas El, 60-anyos, sang gintiro ni alyas Fed, 65-anyos.
Sa imbestigasyon sang Passi City police, nagaguwa nga away sa duta ang motibo sa krimen.
Suno kay Police Lieutenant Charina Pagmanoja, deputy chief sang Passi City Police Station, hubog ang biktima kag nagsinggitan sa iya balay. Nabatian ini sang suspek gani ginhaboy sang bato ang bintana sang balay ni El.
Magka-iping ang balay sang mag-utod.
Nagguwa si El sa iya balay pero gintiro ni Fed.
Na-recover ang 12 gauge shot gun kag isa ka bala sa suspek.
Nahibaluan nga natalana kuntani mag-atubangay ang mag-utod subong nga adlaw agud ma-settle ang issue sa duta.
Yara sa custody sang mga pulis ang suspek. — ARI trainee Robert Nietes
