ILOILO CITY–Ginpamatukan ni Mayor Raisa Treñas kag sang Iloilo Festivals Foundation, Inc., ang hingyo sang Iloilo City Police Office nga signal shutdown.
“Gindesisyunan ni Mayor Raisa Treñas, upod sang Iloilo Festivals Foundation Inc. (IFFI), nga indi pagpasugtan ang [signal] shutdown sa Dinagyang Festival 2026, bangud sang posible nga daku nga inconvenience ini sa pumuluyo kag bisita sang siyudad,” pahayag ni Joy Fantilaga-Gorzal, spokesperson sang alkalde.
Antes sini, nag-meeting si Treñas upod kanday Police Regional Office (PRO) 6 Director, PBGEN Josefino Ligan, kag outgoing Iloilo City Police Office (ICPO) Director, PCOL Kim Legada kag ginpahibalo ang alkalde nga gin-aprubahan ni PNP Acting Chief, PLTGEN Melencio Nartatez, Jr., nga signal jamming lang ang iya gin-aprubahan.
Pero wala ini ginpasugtan sang alkalde.
Labi nga ginkonsiderar ni Treñas ang mga reklamo sang pagkadula sang signal sa iban nga banwa sa probinsiya sang Iloilo kag Guimaras nga indi man sakop sang mga kahiwatan sang kapistahan.
Ginpangabay na lang ni Treñas sa kapulisan nga pabaskugon pa ang ila nga security plans kag mas hugton ang police visibility sa siyudad.
Ginpasalig naman ini sang kapulisan upod ang iban pa nga force multipliers nga i-deploy kadungan sang Dinagyang Festival 2026. — Aksyon Marvin Malificiar
