Pareho nga naka-record sang tag-isa ka kaso sang MPOX ukon monkeypox ang siyudad kag probinsiya sang Iloilo subong nga tuig.
Sa Iloilo City, lima ang nagapaidalom sa isolation nga ginalakipan sang isa ka kumpirmado nga kaso kag apat ka mga suspected cases.
Suno sa City Health Office, estable ang kondisyon sang lima ka mga pasyente. Ginpahayag ni CHO Head, Dr. Mary Ann Diaz, ginatatap sang maayo ang mga pasyente.
Nagapadayon man ang ginahimo nga active case findings kag contact tracing. Wala suno sa iya sang travel history ang lima ka mga pasyente.
Sa Iloilo province, tatlo ka mga specimens ang ginpaidalom sa test kag isa ang nagguwa nga positibo sa MPOX. Suno kay Iloilo Provincial Health Office Head, Dr. Ma. Socorro Quiñon, wala sang travel history ang kumpirmado nga kaso.
Nagapaayo na suno sa iya ang pasyente nga naka-home isolation. Natumod na ang mga close contacts sang pasyente kag ginpaidalom na sa isolation. Wala man sila sang sintomas sang balatian.
Ang mga suspect kag probable cases, ginapaidalom sa specimen collection kag ginahimo ang laboratory testing paagi sa Research Institute for Tropical Medicine para sa confirmation.
