ILOILO — Ginabanta 13 ka beses nga ginbuno ang 15-anyos nga solterito gani napatay sa Barangay Capuling, Dueñas pagkatapos maglagaw tungod switching on sang Christmas lights sa plaza sang banwa. sang Biyernes sang gab-i, Disyembre 12.
Suno kay Police Corporal Reginald Lawague, imbestigador sang Dueñas Municipal Police Station, papuli na kuntani tani ang 15-anyos nga solterito nga si alyas Ken, residente sang Barangay Tahing, Calinog, upod sa apat pa niya ka mga abyan pero naghapit pa sila sa balay sang isa pa nila ka abyan.
Naga-edad 14, 15, 16 kag 17-anyos ang mga abyan ni Ken. Duha ka mga motorsiklo ang dala nila sa diin tatlo sa isa samtang si Ken kag abyan niya nga naga-drive ang sakay sang isa pa.
May nakatulukay nga tatlo ka mga indibidwal si Ken kag iya mga abyan gani may natabu nga indi pag-intiendihanay.
Sa pagpangusisa sang mga pulis, may daan na nga hiligut-anon ang tatlo ka mga indibidwal nga nakontra sang grupo ni alyas Ken kag isa sa mga abyan niya.
Malakat na kuntani sanday Ken upod ang iya mga abyan nga sakay sa mortorsiklo pero ginlagas sang tatlo (3) ka lalaki nga una nila nakatulukay.
Nagpundo ang abyan ni Ken nga naga-drive sang motorsiklo kag ginpanaugan nila ang tatlo ka mag-abyan nga yara man sa ila motorsiklo.
Ginpalapitan sang tatlo ka mag-abyan ang grupo ni Ken kag sang nabatyagan nila nga mabato man ang grupo nga may tatlo ka miyembro, nagdalagan sila balik sa ila mga motorsiklo.
Naabtan naman si Ken tungod nakasandad siya gani siya lang ang nalab-ot kag ginbuno sang trese ka beses.
Nakaagum si Ken sang duha ka pilas sang pagkabuno sa tiyan, duha sa alatrasan, pito sa tuo nga tiil kag duha sa wala. Gindeklarar si Ken nga dead-on-arrival sa ospital.
Paagi sa hot pursuit operation, nadakpan ang 18-anyos nga si alyas Don-don nga amo ang nagbuno kay Ken samtang nagpalagyo ang duha niya ka mga abyan.
Nagpauli si Don-don sa ila balay pagkatapos sang insidente kag sang gin-usisa kon diin na ang duha niya ka mga upod wala siya nakahibalo tungod nahibaluan lang niya ang ila mga ngalan pero wala siya nakatultol kon diin sila naga-istar.
Ginpabutyag ni Don-don nga kutsilyo ang iya gingamit buno kay Ken pero wala na ma-recover tungod ginhaboy niya.
Pasakaan sang kaso nga homicide si Don-don.
