ILOILO — Nagtukod sang Special Investigation Team (SIT) ang Iloilo Police Provincial Office (IPPO) agud mapadasig ang imbestigasyon makaligad nga ginkawatan ang Pawnshop and Jewelry Store, kag Money Changer sa sulod sang GT Town Center sa Pavia.
Suno kay Police Lieutenant Colonel Rolando Araño, spokesperson sang IPPO, mandu ni Police Colonel Bayani Razalan ang gilayon nga pagtukod sang SIT para mapadasig ang imbestigasyon.
Ginabug-usan sang Provincial Intelligence Unit, Criminal Investigation and Detection Group, kag Regional Forensic Unit ang SIT.
Sa subong, tatlo (3) ang persons of interest sang mga pulis nga nakita sa Closed-Circuit Television (CCTV) mga las-3:10 sang kaagahon sang December 17 sa sulod sang mall.
Kapin sa P30 million ang mga nakawat nga alahas kag malapit naman sa P1 million ang cash. — Aksyon Angel Mae Ciudad
