ILOILO CITY—Ginrekomendar sang City Disaster Risk Reduction and Management Council (CDRRMC) ang pagpaidalum sa siyudad sa state of calamity tungod sa epekto sang habagat nga mas ginpabaskog sang naglabay nga mga bagyo Crising, Emong, kag Dante.
Ini makaligad ang ginhimo nga pag-assess nanday Mayor Raisa Treñas upod ang CDRRMC kag City Social Welfare and Development Office sang mga damages kag pierde sang siyudad tungod sa kalamidad.
Suno kay Mayor Treñas, daku ang kahalitan sa sektor sang agrikultura kag ekonomiya, lakip na ang kadamuon sang indibidwal nga apektado.
Suno sa alkalde, daku nga numero ang masobra 50,000 ka naapektuhan nga indibidwal, kag madamo man nga talamnan ang totally damaged sa inisyal nga record sang siyudad.
Isa sa daku nga naapektuhan ang ekonomiya kon diin halos isa ka semana nga patay ang negosyo kag trabaho kadungan man sa pagsuspender sang klase kag trabaho.
Tungod sini, magamit sang siyudad ang Quick Response Fund ukon Disaster Risk Reduction and Management Fund agud makahimo sang relief kag recovery operations sa mga nahalitan sang kalamidad sa siyudad. — Aksyon Marvin Malificiar
