Stray bullet nakit-an sa garahe sang balay sa Mina; Atop sang balay may buho nga inagyan sang bala

ILOILO — Gina-imbestigaran sang Mina police kon diin naghalin ang stray bullet nga nakit-an sa garahe sang balay sa Barangay Dala kahapon, Enero 1.

Suno kay Police Lieutenant Redan Octaviano, officer-in-charge sang Mina Municipal Police Station, samtang nagapungko sa garahe, nakit-an sang tagbalay ang bala sa salog.

Dugang ni Octaviano, may nakit-an sila nga buho sa atop sang balay.

Wala naman sang na-igo sang bala, suno sa pulis.

Ginpabutyag man sang mga naga-istar nga may nabati-an sila nga nahulog sa ila atop kadungan sang paglinukpanay sa pagsug-alaw sa bag-ong tuig pero wala nila ginsapak.

Gin-submit ang bala sa Regional Forensic Unit 6 agud matumod kon sa ano nga pusil halin ang bala. — Aksyon Maria Kayla Tingzon