ILOILO CITY—Nakit-an ang stray bullet sa katre sa sulod sang kuwarto sa isa ka balay sa Villa San Lorenzo sa Loboc, Lapuz pasado la-1 subong nga hapon.
Suno kay alyas Ariel, bag-o lang nga nakapauli ang iya nga pamilya halin sa overnight stay sa hotel kun diin sila nagselebrar sang New Year.
Pag-abot sa balay, nagsulod sa kuwarto ang iya bata nga babaye nga amo ang una nga nakadiskubre sang buho sa kisame.
Una pa nga gindumdom sang iya nga anak nga ginkitkit lang sang ilaga ang amo nga buho, pero sang siya na ang naglantaw, gindudahan na niya nga agi ini sang stray bullet.
Ginpangita nila ang stray bullet, kag sang ginwagwag na ang bed sheet didto kag nakita ang slug sang pusil.
Suno kay Ariel, ang slug posible nga iya sang 45 caliber pistol.
Dugang pa niya, maswerte nga wala sila sa ila nga balay nag-New Year tungod naandan na nila nga magselebrar sang bag-ong tuig sa hotel.
Ini ang una nga kaso sang stray bullet subong nga New Year nga na-record sang Iloilo City Police Office. — Aksyon Marvin Malificiar
