Suspek sa pagpatay kay “Kendi” sa Tubungan nanindugan nga wala niya ginlugos ang biktima

Ang pagpatay lang kay Alyas Kendi sang Ingay, Tubungan ang gin-aku ni Aljohn Jalbuna kag hugot nga ginpanginwala ang paghimulos sa dalaga sang Hunyo 17

Ini base sa sworn affidavit nga gin-file sang suspetsado nga ginpasakaan sang kaso nga rape with homicide kahapon, Hunyo 23.

Sa iya affidavit, gin-aku ni Jalbuna nga ginpatay niya ang dalaga sang ginsulod niya sa kuwarto mga las-dos sang kaagahon sang Hunyo 17.

Antes niya ginsulod ang dalaga sa kuwarto, ginsaysay ni Jalbuna nga naghalin siya sa kamalig ni Alyas “Botbot” sa diin sila nag-inum-inom kag naggamit sang shabu. Pagkatapos sini, nagpauli siya kag nag-agi sa talamnan sa kilid sang balay sang biktima.

Sang nagpangihi siya, suno sa iya, nakita niya nga bukas ang bintana sa kuwarto kag nagpaminsar nga sudlon ini. Sa iya affidavit, nagsaka siya sa natumba nga kawayan kag nagsaka sa bintana.

Sang nakasulod na sa kuwarto, nagsaka siya sa katre sang dalaga kag nabatyagan ini ni Kendi gani nga sang hana nga magsinggit ang biktima, gintabunan niya sa baba.

Ini ang rason nga ginkaros siya sang biktima. Nagpukutay sila nga duha kag nahulog sa katre kag nabatyagan niya nga wala na nagahulag ang dalaga. Ginhakwat niya, kag ginhabolan.. Gilayon siya nga nagpauli kag nagpanago sa iya kuwarto.

Base sa autopsy result, may bagras sa hita kag sa kinatawo sang dalaga nga patimaan nga gin-abuso siya.