ILOILO — Patay ang 31-anyos nga taga- Ungka II, Pavia sang nalumos sa beach sa Barangay Namocon, Tigbauan kaina sang hapon.
Suno kay Police Captain Alfred Mansoy, hepe sang Tigbauan Police Station, natingala na lang ang mga ka-upod sang napatay nga si alyas Joe nga wala na nila makita samtang nagapaligo sila.
Base sa mga panaysayon sang iya kaupdanan nagkadto sa madalum nga porsyon sang dagat ang napatay.
Kantilado ang area sang dagat nga ginpaliguan ni Joe. Posible suno sa hepe nga nabutong sang daludo sang tubig ang biktima gani nga nalumos.
Wala naka-inom sang makahulubog nga ilimnon ang napatay suno sa pulis.
Nagresponder ang mga responders sang Tigbauan apang wala natabangan si Joe.
Gindala pa siya sa ospital pero gindeklarar nga dead-on-arrival. — Aksyon Angel Mae Ciudad
