ILOILO — Nakuhaan sang P68,000 nga balor sang suspected shabu ang tokhang surrenderer sa drug buy bust operation sa Brgy. 15, San Miguel kahapon, Agosto 25.
Suno kay Police Captain Bryan Alejo, officer-in-charge sang San Miguel Municipal Police Station, mga jeepney drivers sa Mandurriao ang masami nagabakal sang illegal nga druga sa subject nga si alyas Hermie, 42-anyos nga residente man sang nasambit nga barangay.
Dugang ni Alejo, wala nagpanugid ang subject kon diin nagahalin ang supply sang illegal nga druga nga iya ginabaligya.
Na-recover sa operation ang apat ka sachets sang suspected shabu nga ginabanta nagabug-at sang 10 grams. — Robert Nietes, ARI Trainee Reporter
