ILOILO CITY – Magapabilin sa aga ang Tribes Competition nga highlight sang Dinagyang Festival 2026 sa Enero 25, suno kay Iloilo Festivals Foundation Incorporated (IFFI) Chairman Judgee Peña.
Sa una nga press conference sang IFFI, gin-anunsyar nga ginaplanuhan nga sayluhon sa hapon ang nasambit nga kumpetisyon. Pero suno kay Peña, pinal na nga magapabilin sa aga ang Tribes Competition tungod amo ini ang tradisyon sang mga Ilonggo.
“Ang aton nga oras [sa tribes competition] amo sa gihapon nga halin sang una nga tradisyon ta – sa aga gid ‘ya tanan gihapon. Masugod kita – sa pagsimba sa San Jose Parish Placer las-seis sa aga kag pagkatapos maderitso kita sa Iloilo Freedom Grandstand, may tribes competition na dayon kita didto,” suno kay Peña.
Ginpahibalo man niya nga lakip lang sa pagbag-o nga imbes apat ka judging areas, ginhimo na lang nga duha – pagkatapos sa Iloilo Freedom Grandstand, mapadulong ang kada tribu sa Iloilo Sports Complex nga magaserbe nga ikaduha nga judging area.
Lakip sa nagapasakop sa kumpetisyon ang Tribu Taga-Baryo sang Brgy. Bo. Obrero, Lapuz; Tribu Ilonganon sang Jalandoni Memorial High School; Tribu Bulawanon sang Molo, Molo District; Tribu Salognon sang Jaro National High School; Tribu Paghidaet sang La Paz National High School; Tribu Pan-ay sang Fort San Pedro National High School; kag Tribu Ilayanhon sang Graciano Lopez Jaena Elementary School.
“SADSAD SA CALLE REAL”
Ginpahibalo man ni Peña nga sa hapon gihapon sang Enero 25 ang Sadsad sa Calle Real nga bukas sa publiko.
Lakip sa mga nagapasakop ang Tribu Parianon, Tribu Yrong-Yrong, Tribu Aninipay, Tribu Familia Sagasa Tribu Molave kag Tribu Panaad.
Mahalin sa Iloilo Freedom Grandstand padulong sa Calle Real ang pagsadsad, dugang ni Peña.
