ILOILO — Lima ang pilason sa vehicular accident nga ginadalahigan sang truck, SUV kag pick-up sa Jibao-an, Pavia kahapon, Abril 10.
Suno sa nakakita nga si Eugene Zapanta, madasig ang dalagan sang truck nga may karga nga sinako sang hog feeds kag natumba pa sang nakabunggo sa SUV kag pick-up.
Halin sa subdivision ang SUV kag maliko na kuntani padulong sa direksyon sang Iloilo City sang nabungguan sang truck nga nagapadulong sa direksyon sang San Miguel.
Tungod sang impact, nagbalang-balang ang truck tubtob nga natumbahan ang nasumalang nga pick-up.
Nagupi ang unahan nga porsyon sang pick-up, samtang wasak naman ang unahan nga porsyon sang SUV.
Naglinapta sa dalan ang sinako sang hog feeds nga karga sang truck.
Nagasgasan sa guya ang driver sang pick-up, samtang nakaagum man sang mga gasgas ang tatlo ka pasahero kag driver sang SUV.
