Tul-an sang tawo nga nasulod sa plastic, naputos sang habol, kag nakagapos ang mga kamot nasapwan sa sulod sang pantyon sa Barangay Culasi, Ajuy

ILOILO — Nasulod sa plastic ang tul-an sang tawo sang nakit-an sa sulod sang pantyon sa Culasi Cemetery Brgy. Culasi, Ajuy kahapon sang aga, Nobyembre 18.

Suno kay Police Staff Sergeant John Cesar Bantigue, imbestigador sang Ajuy Municipal Police Station, gintiltig ang semento sang pantyon tungod manglimpyo kuntani ang pamilya nga nagapanag-iya.

Sang nabuksan ang pantyon, nakibot ang pamilya sang nakit-an ang plastic sa sulod.

Sang ginbuksan ang plastic, nakit-an nga tul-an sang tawo ang unod, naputos sa habol kag nakagapos ang mga kamot.

Gilayon nagtawag ang pamilya sa barangay kag ginpahibalo sa Ajuy Police Station.

Tungod sini, nagtawag sang Scene of the Crime Operatives (SOCO) ang mga pulis agud ma-imbestigaran ang nakit-an nga tul-an.

Dugang pa ni Bantigue, ipaidalum sa medical examination ang tul-an agud ma-identify kag mahibaluan ang iya ginkamatay.

May na-record nga missing person sa ila banwa sang January gani padayon nga gina-imbestigaran ang natabo, suno kay Bantigue. — Aksyon Paula Elambayo