ILOILO — Patay ang ugangan sang ginlabu sang iya umagad samtang nagakatulog sa balay sa Brgy. Dawis, Dingle pasado las-12:55 kaina sang kaagahon.
Suno kay Police Lieutenant Syvele Limjuco, deputy chief of police sang Dingle Municipal Police Station, yara sa impluwensiya sang makahulubog nga ilimnon ang 40-anyos nga suspek sang nagsulod sa balay sang biktima.
Nagakatulog sa sulod sang kwarto ang biktima sang ginlabu sang suspek.
Ginpahayag ni Limjuco nga upod sang biktima sa balay ang bata sang suspek nga amo ang nagpangayo sang bulig.
Sa imbestigasyon sang police, daan nga hiligut-anon kag problema sa pamilya ang motibo sa krimen.
Ginhingagaw dala sa ospital ang biktima pero gindeklarar nga dead-on-arrival tungod sa patal nga pilas sa wala nga butkon kag wala nga paa.
Nagpalagyo ang suspek pagkatapos ginhimo nga krimen pero nadakpan sa hot pursuit operation.
Preso sa Dingle Police Station ang suspek samtang ginahulat ang desisyon sang pamilya kon mapasaka sang kaso. — Aksyon Paula Elambayo
