ILOILO CITY — Nangin masako ang una nga adlaw sang pagpangalagad ni Iloilo City Mayor Raisa Treñas sa puwesto.
Nagsugod ang adlaw sang bag-o nga alkalde sa pagbaton sang donasyon halin sa pribado nga sector lakip na ang isa ka unit sang van kag 20 ka trash bins nga ibutang sa Sunset Boulevard.
Nagpirma kag nagpaguwa sang tatlo ka executive orders si Mayor Treñas nga naga-introduce sang realignment sa mga compositions sang Iloilo City Task Force Drainage, Task Force on Morals and Values Formation (TFMVF) kag Task Force on Anti-Squatting and Illegal Structures Unit (ASIS-U).
Magluwas diri, nag-atubang pa sa press conference ang alkalde sa katapo sang media. Nagbaton man siya sang bisita lakip na kanday PBGen Josefino Ligan, regional director sang Police Regional Office 6, kag PCOL Kim Legada, director sang Iloilo City Police Office.
Ginpasiguro man sang alkalde nga tutokan sang maayo ang pagtrabaho agud padayon nga magsanyog ang siyudad.
Si Mayor Treñas ang labing una nga babaye nga gin-elect sa siyudad sang Iloilo.
