WVSU Calinog Campus nalakip sa listahan sang PNP nga may recruitment activity sang NPA

ILOILO — Ginbuyagyag sang Philippine National Police (PNP) sa ginhiwat nga Senate inquiry sang Committee on Public Order and Dangerous Drugs may kaangtanan sa “Continuous Radicalization and Recruitment of Students in Educational Institutions to the Local Communist Terrorist Groups” kahapon, Agost 6, nga nalakip ang West Visayas State University-Calinog Campus sa listahan nga may recruitment activity sang New People’s Army.

Ginpangunahan ni Senator Ronaldo “Bato” Dela Rosa ang inquiry.

Base sa report sang PNP kay Dela Rosa, may 168 ka mga estudyante sa high school kag universities nga nag-intra nga mangin miyembro sang NPA halin 2014 tubtob 2024.

Sa 102 ka mga eskwelahan nga may mga recruitment activities sang NPA, tatlo ka mga eskwelahan sa Western Visayas ang nalawagan — duha sa Capiz kag isa sa Iloilo.

Magluwas sa West Visayas State University-Calinog Campus, nalakip man sa listahan ang Putian National High School sa Cuartero, Capiz kag Capiz State University (CAPSU)-Dumarao.

Ginpangayuan na sang Aksyon Radyo Iloilo news team sang reaksyon si WVSU President, Dr. Joselito Villaruz sa ginbuyagyag sang PNP apang wala siya sang ideya. — via Aksyon Cedrick Anona