Zero incident sang mga menor-de-edad nga ma-rescue sa lodging houses, kasubong nga mga establisemento target sang TFMVF sa Valentine’s Day

ILOILO CITY–Tinguhaan sang Task Force on Morals and Values Formation nga wala sang menor-de-edad nga makasulod sa mga lodging houses, motels, inns, kag mga beach resorts sa Iloilo City sa Valentine’s day.

Suno kay task force Head Nestor Canong, “aton gid ginatinguhaan nga ma-mentinar ta ang zero incident nga may ara report kag may na-rescue kita [nga menor-de-edad nga makasulod sa lodging houses] upod sa aton mga social worker, sang aton CSWDO kag aton mga police sa Women and Children’s Protection Desk (WCPD).”

Ginpabutyag ni Canong nga ginapasiguro nila nga pag-abot sang Valentine’s day, “wala sang menor-de-edad nga marimalaso, madisgrasya man ukon mabutang man sa alang-alang ang ila buwas-damlag.”

Sa subong, 21 ka mga lodging houses, motels, inns, kag mga beach resorts ang gina-monitor sang task force sa siyudad suno kay Canong.

Ginapahanumdoman niya ang mga menor-de-edad nga kun magselebrar sang Valentine’s day, mas maayo nga mag-upod na lang sa pamilya agud makahatag man sang tiyempo sa ila.