₱102.4 million nga balor sang shabu na-recover sa 8 ka bulan nga anti-drug campaign sa Iloilo City

ILOILO CITY – Wala untat ang operasyon sang Iloilo City Police Office sa pagtapna sang ilegal nga droga sa syudad.

Sa sulod sang walo ka bulan, naka-recover sang P102.4 million nga balor sang shabu ang ICPO sa 487 ka mga operasyon. Naglab-ut sa 593 nga drug personalities ang naaresto sang mga pulis.

Sa amo nga numero, 162 ang ginakabig High-Value Drug personalities, 413 ang street-level individuals samtang 11 ang gin-aresto sang ginserbihan sang warrant of arrest.

Magluwas sa shabu, naka-recover man sang P11,821 nga balor sang marijuana.

Nagapanguna sa mga may pinakadamo nga recoveries ang CDEU, ginsundan sang Iloilo City Police Station 2 sa La Paz kag Police Station 4 sa Molo.

Gindayaw ni ICPO Director PCOL Wilbert Parilla ang accomplishments sang kapulisan sa syudad kag nagpasalig sang mas ginpasangkad nga operasyon batuk sa illegal drugs.