ILOILO – Dead-on-arrival sa ospital ang angkas sang motorsiklo nga nakabunggo sa naga-parking nga wing van truck sa Sitio Pantalan, Barangay Dacutan, Dumangas, la-1:20 kaina sang kaagahon.
Nakaagum sang pilas sa ulo ang angkas nga babaye nga pakaisa sang driver.
Pilason man ang driver sang motorsiklo kag padayon nga ginabulong sa ospital.
Residente sang Barangay PD Monfort South ang driver sang motorsiklo, samtang taga-Barangay Bolilao, Dumangas naman ang angkas niya.
Suno sa hepe sang Dumangas Municipal Police Station (MPS), Police Major Kenn Albert P. Lepsia, halin sa isa ka okasyon ang magpakaisa kag pauli na sang nadisgrasya.
Madulom ang lugar kag madanlog ang dalan rason nga nakabunggo ang salakyan sa likod sang naga-parking nga wing van sa kilid sang karsada.
Ginpahayag ni Lepsia nga 17-anyos ang driver, kag indi siya ang tag-iya sang motorsiklo nga iya ginamaneho.
Sa imbestigasyon sang Dumangas police, nag-parking sang makadali sa higad sang karsada ang driver sang truck agud magpahuway antes siya magpadulong sa Bacolod.
Ginkustodiya sang Dumangas police ang driver sang truck samtang ginahulat ang desisyon sang pamilya sang mga biktima.
