ILOILO — Patay ang driver sang motorsiklo samtang pilason ang iya angkas sang nakabunggo sa 10-wheeler truck nga naka-park sa kilid sang karsada sa Brgy. Pili, Ajuy las-kahapon, Agosto 20.
Ginkilala ang driver sang motorsiklo kay alyas Jayson, 22-anyos, samtang angkas niya amo si alyas John, 29-anyos, pareho nga residente sa amo nga barangay.
Suno kay Police Lieutenant Rick Adrian Navarro, deputy chief sang Ajuy Municipal Police Station, naghalin sa Brgy. Poblacion kag papuli na kuntani ang mga sakay sang motorsiklo nakabunggo sa truck.
Sa imbestigasyon sang police, wala natalupangdan ni Jayson ang truck.
Yara sa impluwensiya sang makahulubog nga ilimnon ang duha ka sakay sang motorsiklo, suno sa police.
Gindala sa Sara District Hospital ang duha pero wala na matabangan si Jayson, samtang nakaagum sang pilas sa nagkalain-lain nga parte sang lawas si John.
Nagpabutyag naman ang driver sang truck nga mahatag sang bulig pinansyal sa mga sakay sang motorsiklo. — Aksyon Maria Kayla Tingzon
