Patay ang driver sang van sang nakabunggo sa Ceres bus sa Barangay Fragante, Pandan, Antique mga las-6 kaina sang aga.
Suno kay Police Lieutenant Allan Otis, deputy chief sang Pandan Municipal Police Station, halin ang van sa Nabas, Aklan kag padulong sa direksyon sang Pandan samtang yara sa pihak nga lane ang Ceres bus sang nagbungguanay sa kurbadahon nga porsyon sang dalan.
Base sa CCTV footage, naglapaw sa pihak nga lane ang van kag nakabunggo sa sugata nga bus.
Tungod sa impact, nawasak ang van, samtang nagdiretso ang bus sa balay sa kilid sang karsada pero maswerte nga wala sang napilasan sa mga naga-estar.
Madanlog ang dalan tungod naga-ulan sang natabu ang aksidente.
May 20 nga sakay sang bus lakip ang driver kag konduktor samtang naga-isahanon lang ang driver sang van.
Outpatient na ang siyam ka mga pasahero kag driver sang bus nga gindala sa ospital tungod sa menor nga mga pilas sa lawas.
Yara sa kustodiya sang Pandan police ang driver sang bus samtang ginahulat kon mapasaka sang kaso ang pamilya sang driver sang van, tag-iya sang balay nga nabungguan kag mga pasahero sang bus. — Aksyon Maria Kayla Tingzon
