Isa ang patay samtang tatlo ang pilason sang nagbungguanay ang duha ka motorsiklo sa Brgy. Paciencia Tobias Fornier, Antique las-9:25 kaina sang aga.
Pakadto sa Brgy. Igdalagit, Tobias Fornier ang Honda Wave nga motorsiklo samtang pakadto sa direksyon sang poblacion sang Tobias Fornier ang Honda RS 125 nga motorsiklo.
Suno kay Police Staff Sergeant Anthony Pelingon, imbestigador sang Tobias Fornier Municipal Police Station, nagasumalangay sa dululhugon nga porsyon sang dalan ang duha ka motorsiklo sang natabo ang aksidente.
Sa imbestigasyon sang police, naglapaw sa linya ang Honda RS 125 gani nakabunggo sa kasugata nga Honda Wave.
Dead-on-arrival sa ospital ang 23-anyos nga driver sang Honda RS 125 samtang padayon ginabulong sa ospital ang isa pa ka driver.
Lunsay may mga angkas ang duha ka motorsiklo nga nakaagum sang pilas sa nagkalain-lain nga parte sang ila lawas.
Ginpahayag sang police nga madasig ang pagpadalagan sang Honda RS 125 nga motorsiklo.
Padayon nga gina-imbestigaran sang police ang natabo. — Aksyon Paula Elambayo
