1 patay, 6 pilason sang nabungguan sang motorsiklo ang Barangay Assistance Desk sa Miagao

ILOILO — Isa patay samtang anum ang pilason sang nabungguan sang motorsiklo sa Barangay Tigmalapad, Miagao mga las-4:30 kahapon sang hapon. Disyembre 1.

Ginkilala ang mga biktima kanday Jerry Niday Sr. nga gindeklarar dead on arrival sa ospital, Maria Allen Niday, Nilda Castro, Clemente Castro Sr., 14-anyos nga solterito, driver sang motorsiklo nga si JB Adrian Gumban kag iya angkas nga si Julia Lorraine Basbaño.

Suno kay Police Major Richard Lao, officer-in-charge sang Miagao Municipal Police Station, nagapadulhog si Gumban sang nadulaan siya sang preno kag nagdiretso sa mga tawo nga yara sa Barangay Assistance Desk.

Ginabanta 20km ang kalayuon sang barangay sa banwa.

Gindala pa sa Miagao Rural Health Unit si Niday pero gindeklarar nga patay.

Gin-refer naman ang iban nga mga pilason sa mga ospital sa Guimbal kag San Joaquin samtang may yara nga nabilin sa RHU.

Ginpalantaw man sa ospital ang driver sang motorsiklo nga nakaagum sang gasgas sa lawas antes i-custody sang Miagao Police. — via Aksyon Maria Kayla Tingzon