ILOILO CITY – Gin-report sang Regional Disaster Risk Reduction and Management Council (RDRRMC) 6 nga 10,570 ka pamilya ang apektado sang wala untat nga pag-ulan sa Western Visayas.
Sa amo nga numero, 9,968 halin sa Negros Occidental; 454 sa Antique; 74 sa Guimaras; 67 sa Iloilo; kag pito sa Aklan. Wala sang napatay kag may isa ka napilasan sa malain nga panahon sa rehiyon.
Base naman sa data sang RDRRMC 6, 106 ka balay ang naguba sa diin 93 ang partially-damaged, samtang 13 ang nawasak gid. Sa mga balay nga naguba, siyam ang halin sa Iloilo; 22 sa Antique; 74 sa Negros Occidental; kag isa sa Aklan.
Samtang, naka-record 480 ka mga pasahero kag 113 ka mga rolling cargoes nga na-stranded sa magkatuhay nga puwerto sa rehiyon.
Nagapadayon naman ang pagpanagtag sang food kag non-food items sa mga naapektuhan nga residente.
Una na nga gin-report sang PAGASA nga ang Hangin Habagat nga ginpabaskog sang bagyo Egay ang nagdala sang pag-ulan sa Western Visayas.
