Nagdesisyon si Iloilo City Mayor Jerry Treñas nga ipa-untat ang pagpangkumpiskar sang driver’s license tungod sa insidente nga ginadalahigan sang tatlo ka traffic enforcers nga ginreklamo nagpangilkil sa pangayaw sang Hulyo 8.
Sa mensahe nga ginpadala sang alkalde, madihon sang proposed ordinance ang City Legal Office para sa issuance sang citation ticket.
“In view of the incident of the 3 PSTMO traffic aides I have decided to stop the confiscation of drivers license effective immediately. The city legal will draft a proposed ordinance for the issuance of a traffic citation for the consideration of the city council.” suno kay Treñas.
Una na gin-aprubahan sang alkalde ang rekomendasyon sang Public Safety and Transportation Management Office (PSTMO) nga immediate dismissal sa tatlo ka traffic enforcers nga amo sanday Janiel Bolencis, Rodnel Bade, kag Sernuel Abad, Jr.
Base sa rekomendasyon sang PSTMO, nag-ako si Bolencis nga nagbaton siya sang P500 halin sa pangayaw nga taga-Mindoro tungod sa truck ban violation kag wala sang sticker sang siyudad.
Nagbaton man siya sang P1,000 halin sa tagreklamo nga OFW nga nag-execute sang left turn sa No Left Turn Lane, kag gintunga nila ini ni Traffic Aide Abad.
Nag-ako man si Abad nga nagbaton sang kwarta halin sa gintunga nila nga P1,000 ni Bolencis kag may ginbaton pa gid siya nga P1,000 sa lain naman nga tagreklamo.
Samtang si Traffic Aide Bade naman, nag-ako nga may ginbaton siya nga kwarta halin sa iya gindakop, nga gin-ipit sa Temporary Operator’s Permit (TOP) booklet agud makuha sang violator ang iya lisensiya.
Una nga nagreklamo sa Aksyon Radyo Iloilo ang pangayaw nga taga-Mindoro nga ginkilkilan siya sang mga traffic aides sa siyudad sang tatlo ka beses sa sulod sang isa lang ka adlaw. — via Aksyon Jeremae ventar with additional information from Aksyon Justice Savannah Pamplona
