ILOILO CITY — Dala pa sang 15-anyos nga dalagita ang iya nga bata sang nadakpan sa drug bust operation sa Barangay Airport, Mandurriao kagab-i.
Suno kay Police Captain Lester Oliveros, officer-in-charge sang Iloilo City Police Station 10 sa Mandurriao, upod sang dalagita nga si alyas Nene si alyas Boy, 15-anyos nga utod sang iya anay karelasyon kag amay sang iya bata sang nadakpan.
Sa impormasyon sang kapulisan, mabisita kontani si Nene sa amay sang iya bata amo nga dala niya.
Pero nagpahibalo ang iya boss nga may mabakal sang illegal nga druga amo nga gin-ulayhon na lang nila.
Nakuha sa operasyon ang apat ka gramos sang suspected shabu nga may standard drug price nga P27,200.
Sa monitoring sang kapulisan, may boss kanday Nene kag Boy nga yara sa presuhan ang contact.
Pebrero naman sang nagsugod sila sa pagbaligya sang illegal nga druga, suno kay Oliveros.
Yara na sa Crisis Intervention Unit (CIU) sa Molo si Nene, samtang sa Balay Dalayunan sa Lapuz naman gindala si Boy. — Aksyon Maria Kayla Tingzon
