ILOILO — Dead-on-arrival sa ospital ang 18-anyos nga lalaki sang nalumos sa suba sa Brgy. Cabudian, Dueñas las-12:00 kaina sang udto.
Ini ang ginkumpirmar ni Mrs. Ma. Gerlie Pastrana, head sang Municipal Disaster Risk Reduction and Management Office sang Dueñas.
Ginkilala ang lalaki kay Dustin Labon nga residente sang amo nga barangay.
Suno kay Pastrana, naglangoy sa suba ang lalaki upod ang iya barkada kaina sang udto.
Samtang nagalangoy, natalupangdan sang mga kaupdanan nga nagasarurot ang lalaki. Gintinguhaan sang mga upod nga masalbar ang lalaki pero nabudlayan tungod sa mabaskog nga current sang tubig sa suba.
Pasado la-2:30 subong nga hapon sang na-recover ang lalaki. Ginpahayag ni Pastrana nga gin-revive sang mga rescuers ang lalaki pero wala na nagaginhawa gani gilayon gindala sa ospital.
Gindeklarar nga dead-on-arrival sa ospital ang lalaki. — Aksyon Paula Elambayo
