ILOILO — Pilason ang duha ka magulang sang ginlabo kag ginkagat sa dulunggan sang ila manghod sa Brgy. Cordova Norte, Tigbauan la-1:40 sang kaagahon kahapon, Agosto 7.
Suno kay Police Captain Mary Jane Panes, hepe sang Tigbauan Police Municipal Police Station, upod nga naga-inum-inom ang 41-anyos kag 43-anyos nga mga biktima kag ang ila manghod nga 34-anyos.
Base sa imbestigasyon, una nga nagbaisay ang 41-anyos kag ang 34-anyos tubtob nga nagpukutay sila.
Gintambagan pa sang 43-anyos ang duha, pero nagkuha sang binangon ang manghod kag ginlabo siya sa liug, suno sa pulis. Magluwas diri, napilasan man ang 41-anyos nga magulang sa dulunggan tungod ginkagat siya sang manghod.
Presu na sa Tigbauan Police Station ang suspect, samtang padayon nga ginabulong sa ospital ang duha ka biktima.
