Sara, Iloilo: Pulis nga anak ni Mayor Neptali Salcedo, naulamid naman sa kontrobersiya

By: Aine Grace Bravo

Liwat naman nga naglupok ang pangalan sang kontrobersiyal nga anak ni Mayor Neptali Salcedo sang Sara kasunod sang ginpahayag aksidente nga shooting incident.

Ang biktima ginpahayag nga nobya ni SPO1 Ricky Salcedo nga si Aiko Sandoval, 23-anyos sang Barangay Paon, Estancia. Napatay si Sandoval bangud sang patal nga igo sang bala sa wala nga parte sang guya kag naglapos sa tuo nga abaga. Tubtob subong, wala gihapon nagahulag ang imbestigasyon sang Sara police kon may foul play ukon kaso gid man sang accidental firing ang natabu.

Ang ginabasehan lang sang Sara police suno sa hepe nga si Sr/Inps. Gilbert Archide ang ginpa-blotter ni SPO1 Salcedo pagkatapos gilayon sang insidente. Ginpahayag sini nga accidental firing lang ang natabu nga nagresulta sang kamatayon sang iya nobya.

Suno sa report, yara sa sulod sang kwarto si Sandoval kag nagapreprar nga magpaligo. Ginpahayag nga ginkuha sini ang tuwalya nga nakahalay sa bangko. Sa ibabaw sang tuwalya, nabutang ang Glock 19 caliber .9mm pistol nga suno kay SPO1 salcedo ginapanag-iyahan ni Sandoval. Gin-alegar ni Salcedo nga sang tuyo na sang nobya sayluhon ang armas, aksidente nga na-discharge kag nag-igu sa iya le-og. Gilayon sini nga gindala sa ospital ang nobya apang gindeklarar nga napatay.

Na-rekober sa crime scene ang Austrian-made Glock 19 nga may isa ka magazine, 10 ka ammunition kag empty shell. Ginhold sang Sara police si Salcedo apang ginpaguwa man ini matapos ginhingyo nga magbulig sa pamilya sang nobya.