Iloilo: Duha ka wanted person, patay sang nagbato sa mga pulis sang ginserbihan sang warrant of arrest sa Barotac Nuevo!

By: Jocelyn Gelloagan-Maque

Duha ka wanted person ang patay sang nagbato sa mga pulis nga magaserbe sang arrest warrant batuk sa ila sa Barangay Acuit, Barotac Nuevo kaina sang kaagahon.

Suno kay Inspector John Ryan Doceo, team leader sang grupo halin sa Iloilo Police Provincial Office (IPPO), una nga nagpalupok sang pusil si Rolando Magno alyas Totong, 35-anyos sang Barangay Familia Sagrada, Dumarao, Capiz.

Naigo suno kay Doceo ang isa ka pulis kag madasig nga gindala sa ospital.

Ginratrat sang mga pulis ang balay sa diin nagatenir si Magno upod kay alyas Cabal Caburobias rason sang ila pagkapatay.

Si magno ang Number 4 wanted person sa Western Visayas kag Number 1 sa Capiz.

Siya ang ginatudlo nga nagpangamot sa pagtiro patay kay John Apura nga bana ni Lemery Mayor Ligaya Apura antes ang May 2013 elections.

Sang damlag lang, ginserbihan sang warrant of arrest si former Lemery Mayor Lowel Arban nga ginatudlo mastermind sa pagpapatay kay Apura.